HADITHE – BLOG
Shpërblimi për mësuesit
Nga Aisheja (r.a) transmetohet se Pejgamberi (a.s) ka thënë:
“Për mësuesin e mirësive kërkon falje çdo gjë, madje edhe peshqit në det”.
(Bezari)
Serioziteti në dije dhe respekti ndaj mësuesit
Nga Ebu Hurejra (r.a) transmetohet se Pejgamberi (a.s) ka thënë:
“Mësoni dituri. Mësoni për diturinë qetësinë dhe seriozitetin dhe jeni të përulur (modest) ndaj atyre prej të cilëve ju mësoni”.
(Tabarani në Eusat)
Kërkimi i faljes dhe pendimi
Ebu Hurejra (r.a) tregon se ka dëgjuar Pejgamberin (a.s) duke thënë:
“Pasha Allahun, unë i kërkoj falje Allahut dhe pendohem tek Ai, më shumë se 70 herë në ditë.”
(Buhariu)
Eaz ibn Jesar El-Muzni (r.a) transmeton se Pejgamberi (a.s) ka thënë:
“O ju njerëz, pendohuni tek Allahu dhe kërkoni falje Atij, sepse edhe unë pendohem tek Ai 100 herë në ditë.”
(Muslim)
Detyra, kufiri, e ndaluara dhe falja
Ebu Thalebe El-Husheni (r.a) transmeton se Pejgamberi (a.s) ka thënë:
“Allahu ka caktuar detyrat dhe mos i lini pas dore. Ka caktuar kufij dhe mos i kaloni. Ka ndaluar disa gjëra dhe mos i prekni. Dhe ka heshtur për disa të tjera, si mëshirë ndaj jush dhe jo prej harresës, prandaj mos hulumtoni për to.”
(Hadith hasen, transmeton Darekutni dhe të tjerë)
Të dashurit për hir të Allahut
Ebu Hurejra (r.a) transmeton se Pejgamberi (a.s) ka thënë:
“Allahu (xh.sh) thotë në ditën e kiametit: “Ku janë ata që janë dashur me njëri-tjetrin për hir Timin?” Sot ata janë në mbrojtjen Time, ku nuk ka mbrojtje përveç mbrojtjes Sime”.
(Muslim)
Respekti, mëshira dhe vlera
Ubadetu ibn Samit (r.a) transmeton se Pejgamberi (a.s) ka thënë:
“Nuk është prej nesh ai që nuk respekton të madhin, nuk mëshiron të voglin dhe nuk e vlerëson dijetarin.”
(Imam Ahmedi dhe Tabarani- (hasen)
Ëndrra e Pejgamberit (a.s) me Xhibrailin dhe Mekailin (a.s)
Nga Semure ibn Xhundeb (r.a) thotë: Pejgamberi (a.s) sa herë që falte namazin, sillej me fytyrë prej nesh dhe thoshte: “Kush prej jush ka parë mbrëmë ndonjë ëndërr?”. Në qoftë se dikush kishte parë ëndërr e tregonte, më pas Pejgamberi (a.s) thoshte: “Mashallah”.
Një ditë na pyeti duke thënë: “A ka parë dikush prej jush ndonjë ëndërr?” Thamë: Jo.
Tha: “Por unë, mbrëmë natën pashë dy persona, të cilët më morën për dore dhe më nxorën në tokën e shenjtë. Aty pashë një njeri të ulur dhe një tjetër që qëndronte në këmbë me një hekur (çengel mishi) në dorë.
Tha: Atë hekur e fut në anën e gojës së tij derisa arrin në fyt, pastaj kështu vepron edhe për anën tjetër. Pasi përfundonte anët e gojës, ato shëroheshin, ndërsa njeriu përsëri kthehej dhe vepronte të njëjtën gjë.
Thashë: Kush është ky njeri?
Dy personat më thanë: Ec.
Ecëm derisa erdhën te një njeri që ishte i shtrirë, ndërsa një njeri tjetër në këmbë mbi kokën e tij me gur në dorë, me të cilin ja shkërmoqte kokën. Kur e godiste guri rrokullisej. Njeriu e merrte gurin përsëri dhe pa u kthyer, koka e personit ngjitej siç kishte qenë më parë. Ky vazhdonte ta godiste.
Thashë: Kush është ky njeri?
Më thanë: Ec.
Ecëm derisa arritën te një gropë që ngjante me një furrë, me majë të ngushtë dhe bazë të gjerë, poshtë saj kishte zjarr të ndezur. Kur zjarri binte njeriu gati sa dilte në sipërfaqe, ndërsa zjarri shtohet, binte edhe një herë në të. Brenda kishte burra dhe gra lakuriq (të zhveshur).
Thashë: Kush janë këta njerëz?
Më thanë: Ec.
Ecëm derisa arritëm te një lumë prej gjaku. Brenda në lumë qëndronte një njeri, ndërsa në breg të lumit një njeri tjetër me gurë në dorë. Njeriu në lumë afrohej dhe sapo bëhej gati të dilte i hidhte një gurë në gojë dhe e shtynte atje ku ishte më parë. Kështu vepronte sa herë që mundohej të dilte prej lumit, duke e kthyer në të.
Thashë: Kush është ky njeri?
Më thanë: Ec.
Ecëm deri sa arritëm te një kopsht i gjelbëruar. Në atë kopsht kishte një pemë të madhe, në rrëzë të cilës ishte një plak dhe disa fëmijë. Ndërsa një njeri tjetër afër pemës ndizte zjarr. Më hipën në pemë dhe më futën në një shtëpi, që nuk kisha parë shtëpi më të bukur se sa ajo. Në të kishte pleq, të rinj, gra dhe fëmijë. Pastaj më nxorën prej saj dhe më hipën në një pemë tjetër. Më futën në një shtëpi që ishte më e bukur dhe më e mirë se e para. Në të kishte pleq dhe të rinj.
U thashë: Gjithë natën më shëtitët, por a mund të më tregoni për ato që pashë?
Thanë: Po. Atë që pe duke çarë anët e gojës së tij, ai është gënjeshtari, që flet gënjeshtra dhe më pas ato përhapen te njerëzit. Kështu veprohet me këtë njeri deri në ditën e kijametit. Atë që pe duke shkërmoqur kokën, ai është njeriu që Allahu ia ka mësuar Kur’anin, derisa gjumi i natës e merr duke lexuar, por nuk punon me të ditën. Kështu veprohet me të deri në ditën e kijametit.
Ata njerëzit që pe në gropë (furrë), ata janë imoralët (njerëzit që bëjnë zina), ndërsa atë njeriun që pe në lumë, ai është që ka ngrënë kamatën. Plaku në rrëzë të pemës ishte Ibrahimi (a.s), ndërsa fëmijët rreth tij, janë fëmijët e njerëzve[1]. Ai që ndizte zjarrin ishte Maliku, roja i zjarrit. Shtëpia e parë në të cilën hyre, është shtëpia e besimtarëve të thjeshtë. Ndërsa shtëpia e dytë, ishte shtëpia e dëshmorëve (shehidëve). Unë jam Xhibrili, ndërsa ky është Mikaili. Ngrije kokën. Ngrita kokën dhe pashë një si re.
Më thanë: Ky është vendi yt.
Thashë: Më lejoni të hyj në shtëpinë time.
Më thanë: Të ka mbetur akoma prej jetës tënde që nuk e ke plotësuar, sikur ta kishe plotësuar do të kishe ardhur në shtëpinë tënde”.
Transmeton Buhariu
Allahu është i Butë dhe e do butësinë në çdo gjë
Aisheja (r.a) tregon se Pejgamberi (a.s) ka thënë:
“Allahu është i Butë, i Mëshirshëm dhe e do butësinë dhe mëshirën. Ai jep për butësinë e mëshirën atë që nuk e jep për ashpërsinë dhe vrazhdësinë.”
(Muslim)
“Allahu është i Butë, i Mëshirshëm dhe e do butësinë dhe mëshirën në çdo gjë”
(Buhariu, Muslim)
Kush dëshiron të hyjë nën mbrojtjen e Allahut?
Ebu Jusr (r.a) tregon se Pejgamberi (a.s) ka thënë:
“Kush dëshiron që Allahu ta marrë nën mbrojtjen e Tij, le t’ia shtyjë borxhin atij që është në vështirësi, ose t’ia falë atë.”
(Ibn Maxhe)
Punët më të dashura tek Allahu
Aisheja (r.a) tregon se Pejgamberi (a.s) ka thënë:
“Punët më të dashura tek Allahu janë ato që janë të vazhdueshme edhe në qoftë se janë të pakta.”
Aisheja (r.a) kur e fillonte një punë e vazhdonte gjithmonë atë.
(Muslimi)
“Shfrytëzo pesë gjëra para pesë të tjerave
Pejgamberi (a.s) i tha një njeriu duke e porositur:
“Shfrytëzo pesë gjëra para pesë të tjerave:
- Rininë para pleqërisë
- Shëndetin para sëmundjes
- Pasurinë para varfërisë
- Kohën e lirë para se të zihesh me punë
- Jetën para vdekjes.”
Siguroni 6 gjëra, t’ju siguroj xhenetin!
Transmetohet nga Ubadetu ibn Samit (r.a) se Pejgamberi (a.s) ka thënë:
“Më siguroni mua gjashtë gjëra prej vetës suaj, e unë do t’ju siguroj juve xhenetin:
- Flisni të drejtën
- Mbani premtimet
- Kryeni amanetet
- Ruani nderin
- Ulini shikimet
- Ndalni duart
Të ndaluarit nga shpërdorimi dhe mendjemadhësia
Transmetohet nga Amër ibn Shuajb, e ai nga babai i tij dhe babai i tij nga gjyshi i tij: Pejgamberi (a.s) ka thënë:
“Hani, jepni dhe vishuni, por pa shpërdoruar dhe pa mendjemadhësi.”
Porosia për tu sjellë mirë kur presim bagëtitë
Transmetohet nga Sheddad ibn Euvs (r.a): Pejgamberi (a.s) ka thënë:
“Allahu e ka shkruar mirësinë për çdo gjë, prandaj kur vrisni, vrisni mirë, kur të prisni bagëtitë, prisni mirë. Secili prej jush le ta prehë mirë thikën dhe të kujdeset për bagëtinë përpara se ta presë atë.”
Vepro kështu, që të hysh në xhenet!
Transmetohet nga Ebu Hurejra (r.a) se ai ka thënë:
O i Dërguar i Allahut! Kur të shikoj ty, më kënaqet shpirti e më gëzohet syri, prandaj më trego për çdo gjë?
Tha: “Çdo gjë është krijuar prej uji”.
I thashë: O i Dërguar i Allahut!
Më trego për një gjë, të cilën n.q.s e zbatoj, hyj xhenet me të?
Tha: “Përhape selamin, ushqe të varfrit, mbaj lidhjet me farefisin dhe falu natën kur njerëzit janë në gjumë, pastaj do të hysh në xhenet i sigurt”.
Je me Zotin, Zoti do të jetë me ty!
Transmetohet nga Ibn Abbasi (r.a): Një ditë isha pas Pejgamberit (a.s) dhe më tha:
“O bir im, po t’i mësoj disa fjalë: Ruaje Allahun (bindu Atij), e Ai do të ruaj ty. Ruaje Allahun (bindu Atij), e Atë do ta gjesh gjithmonë pranë teje. N.q.s. kërkon diçka, kërko vetëm prej Allahut. N.q.s. kërkon ndihmë, kërko vetëm tek Allahu. Dije mirë se, sikur i gjithë njerëzimi të mblidhen për të bërë dobi ndonjë send, nuk do kenë mundësi të bëjnë dobi, përveç me aq sa ta ka shkruar Zoti ty dhe sikur ata të mblidhen për të dëmtuar, nuk do të kenë mundësi të të dëmtojnë, përveç me aq sa ta ka shkruar Zoti ty. Çdo gjë është përcaktuar në kader.
Pesë gjëra shumë të rëndësishme
Transmetohet nga Ebu Hurejra (r.a) se Pejgamberi (a.s) ka thënë:
“Kush është ai njeri, i cili merr nga unë këto pesë gjëra, të punojë me ta ose tua mësojë dikujt që të punojë me ta?”
Ebu Hurejrete thotë: I thashë: Unë, o i Dërguar i Allahut.
Më mori për dore dhe më numëroi pesë gjëra duke më thënë:
- Ruaju prej harameve, do të jesh njeriu më adhurimtar.
- Kënaqu me atë që Zoti të ka caktuar, do të jesh njeriu më i pasur.
- Bëj mirë komshiut, do të jesh besimtar.
- Dëshiroji njerëzve atë që dëshiron për vetën tënde, do të jesh mysliman.
- Mos qesh shumë, se të qeshurit e tepërt mbyt zemrën.
Përmende Allahun pas çdo namazi
Transmetohet nga Muadh ibn Xhebeli (r.a), se Pejgamberi (a.s) e ka marrë për dore dhe i ka thënë:
“O Muadh, pasha Zotin unë të dua ty, pasha Zotin unë të dua ty, dhe tha:
“Të porosis o Muadh, mos lër pa thënë pas çdo namazi: Allahumme einni ala dhikrike ve shukrike ve husni ibadetik”. (O Zoti im, më ndihmo mua në përmendjen Tënde, në falënderimin dhe në adhurimin e duhur).
Shtatë porosi të Pejgamberit (a.s) për Ebu Dherin
Ebu Dheri (r.a) tregon se Pejgamberi (a.s) e ka porositur kështu:
- Më ka porositur ti dua të varfrit dhe të jem afër tyre.
- Më ka porositur të shikoj atë që është më keq se unë dhe jo të shikoj atë që është më mirë se unë.
- Më ka porositur të mbaj fort lidhjet me farefisin edhe n.q.s. ata më largohen.
- Më ka porositur të mos i kërkoj gjë askujt.
- Më ka porositur të them gjithmonë të vërtetën edhe n.q.s. është e hidhur.
- Më ka porositur të mos kem frikë askënd në rrugën e Zotit (xh.sh).
- Më ka porositur të them sa më shumë fjalën: “La havle ve la kuvvete il-la bil-Lah”, sepse këto fjalë janë thesar që qëndron poshtë Arshit.
Detyrat e myslimanit ndaj myslimanit
Transmetohet nga Ebu Hurejra (r.a) se Pejgamberi (a.s) ka thënë:
- “Mos keni smirë njëri-tjetrin,
- Mos mashtroni njeri-tjetrin,
- Mos urreni njëri-tjetrin,
- Mos i sillni shpinën njëri-tjetrit,
- Mos shit-bleni ndaj njëri-tjetrit
- Dhe bëhuni robër të Allahut vëllezër.
- Myslimani është vëlla i myslimanit,
- nuk e zhgënjen dhe as nuk e përbuz atë.
- Devotshmëria është këtu, duke bërë me dorë nga kraharori i tij tre herë.
- S’ka gjë më të keqe për myslimanin se sa të përbuzë vëllanë e tij mysliman.
- Çdo mysliman ndaj myslimanit e ka të ndaluar
- gjakun,
- pasurinë
- dhe nderin e tij”.
Mirësitë e ditës së Xhuma
Evs ibn Evs (r.a) tregon se Pejgamberi (a.s) ka thënë:
“Dita më e bukur e juaj, është dita e Xhuma. Në atë ditë është krijuar Ademi dhe, po në atë ditë ka vdekur. Në atë ditë do ti fryhet surit dhe, në atë ditë është krisma e madhe. Prandaj bini sa më shumë salavate mbi mua, sepse salavatet tuaja më prezantohet mua.” (Sal’lallahu alejke ja Resulellah!)
Mbroni, jepni dhe falënderoni
Ibn Umeri (r.a) tregon se Pejgamberi (a.s) ka thënë:
“Kush ju kërkon mbrojte duke u betuar në Zotin xh.sh., mbrojeni. Kush ju kërkon duke u betuar në Zotin xh.sh, jepjani. Kush ju fton, përgjigjuni ftesës dhe, n.q.s. dikush ju bën një mirësi, atëherë shpërblejani, por po qe se nuk keni mundësi ta shpërbleni atëherë lutuni për të, derisa ta shikoni se ju e keni shpërblyer.”
Dhikri i mëngjezit dhe i mbrëmjes
Enes ibn Maliku (r.a) thotë, se Pejgamberi (a.s) i ka thënë Fatimes (r.a):
“Çfarë po të ndalon të dëgjosh atë që po të këshilloj dhe, të thuash kur të ngrihesh në mëngjes dhe kur të erresh në mbrëmje: O i Gjallë, o i Përjetshmi, me mëshirën Tënde po të kërkoj ndihmë. Më ndreq gjithë punët e mia dhe, mos më lër të mbështetem tek vetja ime, as edhe për një moment të vetëm”.
Konsideroje veten në këtë botë si të huaj
Transmetohet nga Ibn Umeri (r.a): Pejgamberi (a.s) më vuri dorën në krah dhe më tha:
“Konsideroje veten në këtë botë si të huaj, ose si udhëtar”.
(Ndërsa Ibn Umeri (r.a) thoshte: (Kur të bie nata mos e prit sabahun dhe, kur te dal drita mos e prit mbrëmjen. Sa je shëndosh mendo se do të sëmuresh dhe, sa të jesh gjallë mendo se do të vdesësh).
Udhëtimi është pjesë e dënimit
Ebu Hurejra (r.a) tregon se Pejgamberi (a.s) ka thënë:
“Udhëtimi është pjesë e dënimit. Kur ndonjë njeri udhëton ai ndalohet prej ushqimit, ujit dhe gjumit, prandaj sa të mbaroni punët për të cilat keni udhëtuar, shpejtoni për tek familja juaj”.
Prej cilësive të besimtarit
Ebu Hurejra (r.a) tregon se Pejgamberi (a.s) ka thënë:
“Besimtari i fortë është më i mirë dhe më i dashur tek Allahu se sa besimtari i dobët, megjithëse tek të dy ka mirësi. Kujdesu për atë që të bën dobi, kërkoi ndihmë Allahut dhe mos përto. Po qe se të godet diçka, mos thuaj: Sikur të kisha vepruar do të kishte qenë kështu e ashtu, por thuaj: Ishte përcaktimi i Zotit, atë që ka dashur ka bërë, sepse “sikur” hap derën shejtanit”.
Urrejtja ndaj padrejtësive
Xhabir ibn Abdilahi (r.a) tregon se Pejgamberi (a.s) ka thënë:
“Ruajuni (mos bëni) padrejtësi, sepse padrejtësia është errësirë ditën e kiametit dhe ruajuni lakmisë, sepse lakmia i ka shkatërruar ata që kanë qenë përpara jush. Ajo i nxiti të derdhin gjak dhe të përdhosin nderet e tyre”.
Ndalimi për të mallkuar
Xhabiri ibn Abdilahi r.a. tregon se Pejgamberi (a.s) ka thënë:
“Mos mallkoni veten, mos mallkoni fëmijët dhe mos mallkoni pasurinë tuaj, sepse po qe se mallkimi bie në momentin kur Zoti (xh.sh) pranon lutjet, ju pranohet edhe mallkimi”.
Largohuni prej shtatë gjërave
Ebu Hurejrete r.a. tregon se Pejgamberi (a.s.) ka thënë:
“Largohuni prej shtatë gjërave shkatërruese”.
O i Dërguar i Allahut, cilat janë ato?
Tha:
- Shirku Allahut (ti bësh shok Allahut).
- Magjia
- Vrasja e njeriut, të cilin Zoti (xh.sh) e ka ndaluar, veçse me të drejtë.
- Ngrënia e kamatës.
- Ngrënia e pasurisë së jetimit.
- Tërheqja nga fusha e betejës.
- Akuza (shpifja) ndaj grave të ndershme besimtare.
Dhjetë porosi për Muadhin (r.a)
Muadh ibn Xhebeli (r.a) tregon:
Më porositi Pejgamberi (a.s) me dhjetë gjëra, duke më thënë:
- Mos i bëj shirk Zotit, edhe po qe se të vrasin ose të djegin.
- Mos i dëshpëro prindërit, edhe po qe se të urdhërojnë të largohesh prej familjes dhe pasurisë tënde.
- Mos e lë me qëllim pa falë namazin farz, sepse kush lë me qëllim pa falë namazin farz, nuk do të ketë më mbrojtjen e Allahut.
- Mos pi kurrë alkool, sepse alkooli është koka e të gjitha të këqijave.
- Mjerë për ty në qoftë se bën mëkat, sepse mëkati sjell zemërimin e Allahut.
- Mjerë për ty në qoftë se largohesh nga beteja, edhe po qe se të gjithë vdesin.
- Në qoftë se njerëzit i godet vdekja, ti qëndro.
- Shpenzo për familjen tënde nga pasuria jote.
- Mos neglizho asnjëherë edukimin e tyre (familjes).
- Folu përherë për frikën e Allahut.
[1] Fëmijët që kanë vdekur në moshë të vogël (sh.p)